गुगल मॅपची न्यारी दुनिया

गुगल मॅपिंग सेवेला नुकतीच दहा वर्षे पूर्ण झाली. अत्यंत महत्त्वाच्या आणि विश्वसनीय म्हणून ओळखल्या जाणाऱ्या या सेवेचा वापर दररोज कोट्यवधी लोकांकडून बिनदिक्कत केला जातो. स्मार्टफोन, अॅप आणि डेस्कटॉप या माध्यमातून स्ट्रीट व्ह्यू, सॅटेलाइट इमॅजरी आदी सेवा वापरल्या जातात. जसा या सेवेचा वापर वाढला, तसे मॅपमध्ये बदल केले. हे बदल अनेकांच्या गावीही नाहीत. म्हणूनच 'गुगल मॅप्स'च्या नव्या फीचर्सविषयी... 

ऑफलाइन मॅप्सची निर्मिती 

जर तुम्हाला देशातील एखाद्या ठिकाणी सहलीसाठी जायचे असेल आणि दुर्दैवाने तुमच्याकडे इंटरनेट कनेक्टिव्हिटी उपलब्ध नसेल, तर तुम्ही संबंधित ठिकाणचे मॅप डाउनलोड करून त्याचा वापर करू शकता. त्यासाठी स्मार्टफोवर मॅपचे अॅप डाउनलोड करा. त्यानंतर तुम्हाला हवा तो परिसर निवडा आणि इन्फॉर्मेशन पॅनेलवर टिचकी मारा. तेथे तुम्हाला ऑफलाइन मॅप सेव्ह करण्याचा पर्याय दिसू लागेल. त्यानंतर हा नकाशा मोठा अथवा लहान करून पाहण्याचे पर्यायही उपलब्ध आहेत. 

ठिकाणांचा मागोवा घेण्यासाठी 

अँड्रॉइड स्मार्टफोनच्या माध्यमातून गुगल मॅपवरून मिळविण्यात येणारी ठिकाणे, रस्ते किंवा संबंधित ठिकाणाची माहिती या अॅपवर तशीच संग्रहित करून ठेवण्यात येते. एकदा घेतलेली माहिती पुन्हा मिळवायची असेल, तरhttp://maps/google.com/locationhistory येथे पाहता येते. या वेबपेजवरून तुम्ही आतापर्यंत घेतलेली माहिती आणि एखाद्या ठिकाणी तुम्ही उपस्थित असलेली वेळ आदींची माहिती मिळवता येते. ही माहिती पुन्हा संग्रहित करायची असल्यास तुम्हाला गुगल आयडीच्या मदतीने साइन इन व्हावे लागेल. ही संग्रहित माहिती कायमस्वरूपी नाहीशी करायची असेल, तरी वरील लिंक उपयोगात आणावी. 

जवळच्या ​ठिकाणांचा आढावा 

ज्यावेळी तुम्ही गुगल मॅप्सच्या सर्चबारवर टिचकी मारता, त्यावेळी यापूर्वी घेतलेली मदत समोर दिसण्यास सुरुवात होते. सर्चबारच्या खाली पाहिले असता, संबंधित परि​सरातील कॅफे, लाउंज, एटीएम, हॉस्पिटल आणि अन्य सेवांविषयी माहिती दिसते. यापैकी एका पर्यायावर टिचकी मारली असता, तुम्ही ज्या परिसरात आहात तेथील आजूबाजूच्या भागातील व्यापारी केंद्रांची माहिती मिळते. 

जाणून घ्या ट्रॅफिकची अवस्था 

तुम्ही ज्या शहरात वास्तव्यास आहात, तेथील वाहतुकीची अवस्था गुगल मॅप्सच्या अॅपवर किंवा वेबसाइटवर उपलब्ध आहे. कोणत्याही भागातील वाहतुकीची स्थिती या माध्यमातून मिळवता येते. जेणेकरून संबंधित भागात वाहतुकीची कोंडी असल्याचे समजल्यास दुसरा मार्ग निवडता येतो आणि वेळेत बचत करता येऊ शकते. गुगल मॅपवर ट्रॅफिकची अवस्था दर्शविण्यासाठी विविध रंगांचा वापर करण्यात येतो. वाहतूक सुरळीत चालू असेल, तर हिरव्या रंगाचा वापर करण्यात येतो. मध्यम गतीने वाहतूक सुरू असेल, तर पिवळा किंवा नारंगी रंगाचा वापर करण्यात येतो. रस्त्यावर मोठ्या प्रमाणात वाहतुकीची कोंडी असेल, तर लाल किंवा चॉकलेटी रंगाचा वापर करण्यात येतो. 

दोन ठिकाणांमधील अंतर 

गुगल मॅपच्या वेबसाइटवर गेल्यानंतर उजव्या बाजूला टिचकी मारल्यानंतर लहान आकाराचा मेन्यू बॉक्स उघडतो. या मेन्यू बॉक्समध्ये 'Measure Distance' असा पर्याय निवडा. त्यानंतर तुम्हाला पाहिजे असणाऱ्या दोन शहरांतील ​किंवा दोन ठिकाणांमधील अंतराची माहिती विचारा. त्यानंतर गुगल मॅप त्या दोन ठिकाणांमधील अंतर मोजून तुम्हाला कळवेल. 

मॅप्स गॅलरीही उपलब्ध 

गुगल मॅपच्या अन्य यूजरनी निवडलेले पर्याय, रस्ते, ​ठिकाणे, त्यांची माहिती, उपलब्ध असल्यास त्यांची छायाचित्रे गुगल मॅपवरील गॅलरीत साठवून ठेवण्यात येतात. या गॅलरीच्या माध्यमातून अन्य यूजर त्यांना हवी असलेली सर्व माहिती अथवा छायाचित्रे घेऊ शकतो. या शिवाय जगाचा नकाशाही येथे उपलब्ध आहे. त्यातून तुम्हाला हवी ती माहिती सहज मिळवत येते. या सेवेचा उपयोग करण्यासाठी htttp://maps.google.com/gallery या वेबपेजला भेट द्यावी. या वेबपेजवर विविध रंजक माहितीसह संबंधित ठिकाणचे नकाशे, फोटो तसेच इमेजरी उपलब्ध आहेत. 

एकहाती करा काम 

गुगल मॅपवरील बऱ्याच पर्यायांचा वापर करताना दोन्ही हातांची गरज पडते. मात्र, काही पर्यायांचा अवलंब करताना हा द्राविडी प्राणायाम करण्याची आवश्यकता नाही. एकूण पर्यायांमधील काही पर्यायांचा एकहातीही वापर करता येतो. स्क्रीनवर दोनदा टिचकी मारून डिस्प्लेवर बोट ठेवून तुम्ही मॅप झूम इन, झूम आउट करू शकता. 

गुगल मॅपला उपलब्ध पर्याय 

मॅपमायइंडिया : मॅपमायइंडिया या अॅपच्या माध्यमातून तुम्हाला खूप बारकावे आणि माहिती असणारे विविध नकाशे पाहता येतील. या अॅपद्वारे संबंधित शहराचा बारीकसारीक माहितीसह असणारा नकाशा डाउनलोड करता येतो. ऑनलाइन आणि ऑफलाइन या दोन्ही पद्धतींनी नकाशा उपलब्ध आणला जाऊ शकतो